Festa di la donna allu spitali
(di Maria)
Tuttu mi putia penzari,
quandu vinni a stu spitali
ca trovava aggenti buani, cari e santi
chi rallegranu lu cuari atutti quanti.
Pua, si no vi dispiaciti di sta cosa,
aiu mu vi dicu, cu na bella mimosa,
ca si na fantasia mi vinia alla menti
no n'era ciartu di festeggiamenti.
Quandu pianzi allu spitali
pianzi nomm'hai di ritornari
ca pianzi sulu alli malanni:
mbeci, cca', si chinu di speranzi
ca quandu tuarni zumpi e danzi.
Chistu abbastava pi nnui aguannu
ma appamu di cchiù, ca snza lagnu
ni trovamma senza gonna
pi lla festa di la donna.
Lu pigima e la cammisa,
vistiru la festa e, pilla spisa
no nni ficiamu mbrogghiari
e penzamma allu mangiari.
N'accattamma durci e biscotta
e di aranciati na bona botta.
Mu facimu bona festa
penzamma mu mintimu dui euru a testa.
Ma normali ca portamma,
'ntra la sala la mangiogna
di li buorsi e puru di li piatta
chi passa la bugatta.
Pua nommu vi scordati li sonaturi
Cicciu, Pascali, Ntuani ... ed actri puru,
chi ni tenanu allegri e sognaturi.
Ca ni nzonnamu ca simu di vint'anni
e zumpamu tarantelli a muarimammi.
Puru ca no servanu, sti cuasi
ricordativi ca su cuamu li ruasi
chi li ciarchi e ti 'nnamuri
puru ca si culli duluri.
No vi pigghati di pena belli duanni
ca si aviti mali 'cca tornati
e portati puru li vostri cognati,
e puru li suaru e li nuanni,
chi venanu ciunchi
e si 'ndi tornanu jiunchi.
Ava pua chlli 'mpirmiari,
c'hannu nu garbu di no disprezzaari
La Marisa li rapprisenta cud'onori
ca la matina ti risbigghia cu l'odori
di lu pani e di la gintili prìsenza
nziami alli colleghi, chi nompua fari senza.
Beh, alla fini festeggiamu cullu cuari allegru
tutti li fimmini chi sacrifici ndi ficiaru daviaru.
Pi d'oji scordativi si vuliti
di li dottori, ca è festa e punturi no 'ndi vuliti;
ricordativi, pero, ca illi stannu vigili e prisenti
pimmavissa di duluri nomm'aviti nenti.
Ricordativi ca li malati vannu cunzulati
ma non vannu ciangiuti e 'ncrucifssati;
tra Rosari e prighiari genuini
cantamu, sonamu e scordamuni di li guai fina allu matinu.
Vi ringraziu c'arricchiastuvu sta stornella
ma mo penzamu puru alla cara Antonella,
a Toninu e tutti chilli jiuti via,
chi s'ernu ccà cantavanu cu allegria.
E no ni scordamu di la cara Graziella,
chi culla gintilezza, saggezza ed umiltà
n'inchiu di affettu e generosità.
La clinica Oliveto quanti scherzi ficia,
chilli di Arena mu si trovanu cu chilli di Fabrizia
E pua lu pajisi di Tiresa e Antonietta,
Rita, Marianna e Marietta
e l'atri ancora, cari mia,
chi ni ficiaru fari sta bella cumpagnia.
Su sicura ca quandu tornamu a stu spitali
ni ricordamu c'avimma na yornata speciali
e culla grazia di la Madonna
ni ficiamu puru la festa di la donna.
8 marzo 2009 Maria
.jpg)